વડોદરા શહેર પોલીસે નશીલા પદાર્થોની હેરાફેરીના નેટવર્ક સામે વધુ એક મોટી સફળતા હાંસલ કરી છે. સયાજીગંજ પોલીસે શહેરના સેન્ટ્રલ બસ ડેપો પરથી આશરે ૮.૨ કિલોગ્રામ (૮.૧૯૬ કિલો) ગાંજાના જથ્થા સાથે એક યુવકની ધરપકડ કરી છે. આ કાર્યવાહીથી ઓરિસ્સાથી ગુજરાતના શહેરોમાં ડ્રગ્સની સપ્લાયના નેટવર્કનો પર્દાફાશ થયો છે.
પોલીસને બાતમી મળી હતી કે એક વ્યક્તિ ગેરકાયદેસર રીતે ગાંજાનો મોટો જથ્થો લઈને સેન્ટ્રલ બસ ડેપો ખાતે હાજર છે અને આગળ ડિલિવરી કરવા જઈ રહ્યો છે. આ બાતમીના આધારે સયાજીગંજ પોલીસે તાત્કાલિક સેન્ટ્રલ બસ ડેપો વિસ્તારમાં વોચ ગોઠવી હતી.
પોલીસની વોચ દરમિયાન, શંકર રાણા નામના એક યુવકની હિલચાલ શંકાસ્પદ જણાતાં તેને અટકાવવામાં આવ્યો હતો. યુવકની અંગત અને સામાનની તપાસ કરતાં, તેની પાસેથી ગેરકાયદેસર ૮.૨ કિલો ગાંજાનો જથ્થો મળી આવ્યો હતો. જપ્ત કરાયેલા ગાંજાની બજાર કિંમત લાખો રૂપિયામાં થવા જાય છે.
પ્રાથમિક પૂછપરછમાં આરોપી શંકર રાણાએ કબૂલાત કરી હતી કે તે આ ગાંજાનો જથ્થો ઓરિસ્સા રાજ્યમાંથી લઈને આવ્યો હતો અને તેની ડિલિવરી ગુજરાતના મોટા શહેર સુરત ખાતે કોઈ વ્યક્તિને આપવા જઈ રહ્યો હતો.
સયાજીગંજ પોલીસે તાત્કાલિક આરોપી શંકર રાણાની ધરપકડ કરી છે અને તેની સામે NDPS (Narcotic Drugs and Psychotropic Substances) એક્ટ હેઠળ કાયદેસરની કાર્યવાહી શરૂ કરી છે. પોલીસ હવે આ નેટવર્કમાં ઓરિસ્સાથી સુરત સુધી સંકળાયેલા અન્ય લોકો કોણ છે અને આ રેકેટના મૂળ ક્યાં સુધી ફેલાયેલા છે, તે અંગેની ઊંડાણપૂર્વક પૂછપરછ અને તપાસ હાથ ધરી છે. તહેવારોની સિઝન નજીક આવી રહી છે, ત્યારે નશીલા પદાર્થોની હેરાફેરી સામે પોલીસની આ કાર્યવાહી એક મોટી સફળતા ગણાય છે.
